आम जनता पार्टीका राष्ट्रिय अध्यक्ष एवम् रौतहट क्षेत्र नम्बर ३ का संघीय सांसद प्रभु साहविरुद्ध आइतबार जिल्ला अदालत गौरले अवहेलनाको मुद्दामा कारण देखाउ आदेश जारी गरेको छ । सांसद साहले सामाजिक संजाल फेसबुकमा रौतहटका न्यायाधीशलाई नेताका झोले कार्यकर्ता भनेर स्टाटस लेखेका थिए । जिल्ला न्यायाधीश शम्भुप्रसाद रेग्मीको इजलासले सांसद साह लगायतका विपक्षीका नाममा कारण देखाउ आदेश गरेको हो । सांसद साहले केही समयअघि फेसबुकमा न्यायाधीशलाई नेताका झोले कार्यकर्ता भनेर स्टाटस पोष्ट गरेपछि अदालतप्रति अपमान भएको भन्दै बौधीमाई नगरपालिकाका नगरप्रमुख प्रदीपकुमार यादवले गत शुक्रबार जिल्ला अदालत रौतहटमा मुद्दा दर्ता गरेका थिए । उक्त मुद्दाको आइतबार सुनवाइ भएको हो । सुनवाइपछि न्यायाधीश रेग्मीले निवेदन मागबमोजिम तपाईंलाई किन सजाय हुन नपर्ने हो भनी विपक्षीका नाममा कारण देखाउ आदेश जारी भएको अदालतका श्रेस्तेदार उद्धव ढोडारीले जानकारी दिए । वादीका तर्फबाट अधिवक्ता राजाराम रायले बहस गरेका थिए । बौधीमाई नगरपालिकामा बाटोको विषयलाई लिएर सांसद साह पक्ष र नगरप्रमुख यादव पक्षबीच लामो समयदेखि विवाद हुँदै आएको छ । सोही घटनामा कुटपिट, अभद्र व्यवहार तथा गालीगलौजको आरोपमा दुई साताअघि स्थानीय गंगाराम बैठालाई अदालतले थुनामा राख्न आदेश दिएको थियो । बैठा साह समर्थक हुन् । त्यसपछि सांसद साह पक्षका मानिसहरु नगरप्रमुख सित आक्रोशित छन् । यही आदेशपछि सांसद साहले न्यायाधीशलाई नेताका झोले कार्यकर्ता भनेर टिप्पणी गरेका हुन् ।

महोत्तरीको जलेश्वर कारागारका एकजना कैदीको मृत्यु भएको छ । धनुषाको बटेश्वर गाउँपालिका १ कार्तिकुमरका ५६ वर्षीय जोगेन्द्र महराको मृत्यु भएको हो । अचानक बेस्सरी पेटदुखेपछि उनलाई मध्यराति प्रादेशिक अस्पताल जलेश्वरमा भर्ना गरिएको थियो । उपचारको क्रममा शनिबार राति साढे दूई बजेतिर उनको मृत्यु भएको कारागार प्रशासन प्रमुख अशोक क्षेत्रीले जानकारी दिए । उनका अनुसार महरा पहिलेदेखि नै औषधि सेवन गरिरहेका थिए । २०३८ सालमा गाउँकै खेतमा भएको आगजनी घटनामा दोषी ठहर गर्दै उनलाई जिल्ला अदालत धनुषाले कैद सजाय सुनाएको थियो । त्यसबेलादेखि फरारका लिस्टमा रहेका उनलाई दुई वर्षअघि प्रहरीले पक्राउ गरी कैद भुक्तानका लागि कारागार चलान गरेको थियो ।

आम जनता पार्टीका अध्यक्ष प्रभु साहविरुद्ध रौतहट जिल्ला अदालतमा अवहेलना मुद्दा दर्ता भएको छ । प्रतिनिधिसभा सदस्य समेत रहेका साहले केही दिनअघि आफ्नो फेसबुकमा ‘रौतहट जिल्ला अदालतका झोले न्यायाधीश’ भनेर लेखेका थिए । अदालतको अपमान गरेको भन्दै सांसद साह उपर बौधिमाई नगरपालिकाका मेयर प्रदिपकुमार यादवले गत शुक्रबार मुद्दा दर्ता गराएका हुन् । तहट क्षेत्र नम्बर ३ बाट निर्वाचित सांसद साहले आफ्ना फेसबुक आइडीबाट ‘न्यायाधीश नेताका झोले कार्यकर्ता’ भनेर टिप्पणी गरेका थिए । आजपा अध्यक्ष साह र महासचिव त्रिभुवन साह उपर गत शुक्रबार मुद्दा दर्ता भएको हो । साह उपर अदालत परिसरमा ज्यान मार्ने धम्की दिएको आरोप पनि छ । बाटो खाली गराउने क्रममा नगर प्रमुख यादवमाथि आक्रमण तथा अभद्र व्यवहार गर्ने गंगाराम बैठालाई पुर्पक्षका लागि थुना पठाउने आदेश भएको थियो । आदालतको आदेश आउनुअघि नै महासचिव साहले आफूलाई आदालत परिसरमै ज्यान मार्ने धम्की दिएको नगर प्रमुखले यादवले दाबी गरेका छन् । उक्त मुद्दामा आज सुनुवाइ हुँदैछ ।

स्वर्गद्वारी गुठीका मोही किसानहरूले काठमाडौंको माइतीघरमा धर्ना दिएका छन्। आइतबार बिहानदेखि तीन बुँदे माग राख्दै धर्ना बस्न थालेका हुन्। उनीहरू गौशाला चोकदेखि र्‍याली गरी माइतीघर मण्डलमा पुगेका थिए। दाङको देउखुरीस्थित १२ मौजा ९गाउँ०का पीडितहरू काठमाडौंमा धर्ना दिन आएका हुन्। उक्त गाउँको एक हजार ५० बिघा जमिन गुठी अन्तर्गत पर्छ। किसानले पुस्तौंदेखि खेतिपाती गर्दै आएको ती जग्गाको मोही आफूहरू रहेको तर स्वामित्व भने स्वर्गद्वारी गुठीको नाममा भएको पीडित मोही किसान संघर्ष समितिले जनाएको छ। यसअघि दाङमै २०८० फागुन ७ देखि १ महिनामै आन्दोलन गरेका थिए। सरकारसँग दुई बुँदे सम्झौता भएपनि एक वर्ष हुँदा पनि कार्यान्वयन नभएको उनीहरूको भनाइ रहेको छ । उनीहरूले मोही किसानले जोतभोग गर्दै आएको जमिन मोहीको नाममा रैतानी हुने कानुनी व्यवस्था, विशेष प्रकृतिको निजी भनिएको गुठी जग्गाका निष्काशित मोहीको हक पुनर्स्थापित गर्न र किसानले बुझाउनुपर्ने रैतानी बापतको तिरो वडामार्फत बुझाउने व्यवस्था गर्न माग गरेका हुन्।

प्युठानको गौमुखी गाउँपालिका – ५ का ६८ वर्षीय चिन्तामणि उपाध्यायको हत्यामा संलग्न दुईजना पक्राउ परेका छन्। पक्राउ पर्नेमा गौमुखी– ५ खुङ्गका ५१ वर्षीय लोकबहादुर गिरी र ५० वर्षीया जेदु न्यौपाने छिन्। पक्राउ परेकाहरू नातामा ज्वाँइ(सासु हुन्। लोकबहादुर जेदुकी बहिनीका श्रीमान् हुन्। चिन्तामणिको शव माघ १८ गते बिहान ९ बजे फुर्सेधारास्थित खुङ्ग(नारिकोट जोड्ने कच्ची सडकमा फेला परेको थियो। प्रहरी प्रमुख डिएसपी दिपेश बस्यालका अनुसार चिन्तामणिको टाउको, अनुहार, नाक र मुखमा गहिरो चोट थियो। हत्या अघिल्लो दिन ८ बजेतिरै भएको अनुसन्धानपछि पत्ता लागेको थियो। हत्याको कारण त्रिकोणात्मक अवैध प्रेम सम्बन्ध रहेको प्रहरी अनुसन्धानबाट खुलेको छ। बिहीबार बेलुकी जेदुले नै चिन्तामणिलाई फोन गरेर फुर्सेधारा बोलाएकी थिइन्। तर फुर्सेधारामा जेदु एक्लै थिइनन्। साथमा उनकै ज्वाँइ लोकबहादुर थिए। जेदू लोकबहादुरसँग प्रेम सम्बन्धमा थिए, त्यसअघि चिन्तमणिसँग पनि उनको प्रेम थियो। जेदुका श्रीमान रोजगारका सिलसिलामा केही वर्षयता भारतमा छन्। छोराछोरी सबैको विवाह भइसकेको छ भने घरमा जेदु एक्लै बस्दै आइरहेकी थिइन्। त्यस क्रममा चिन्तामणिसँग उनी नजिकिएकी थिइन्। चिन्तामणिसँग प्रेममा हुँदा जेदूको सम्बन्ध आफ्नै ज्वाँइ लोकबहादुरसँग पनि थियो। त्यसबारेमा चिन्तामणि पनि जानकार थिए। एक वर्षअघिदेखि भने चिन्तामणि र जेदूबीच त्यति राम्रो सम्बन्ध थिएन। प्रहरीको अनुसन्धानअनुसार एक वर्षअघि चिन्तामणिले जेदुलाई उनकै घरभित्र लोकबहादुरसँग फेला पारेका थिए। त्यसपछि बाहिरबाट चुकुल लगाइदिएर गाउँलेलाई खबर गरिदिएका थिए। त्यसो हुँदा गाउँभरि उनीहरू दुईबीचको अवैध सम्बन्धको कुरा फैलिएको थियो। त्यतिबेलादेखि जेदु र लोकबहादुर चिन्तामणिका कारण आफूहरुको गाउँभरि बेइज्जत भएको भन्दै बदला लिने योजना बनाइरहेको प्रहरी अनुसन्धानबाट खुलेको छ। त्यतिबेलादेखि खासै राम्रो सम्बन्ध नभएकी जेदूले ९माघ १७ गते बिहीबार भेट्न बोलाएपछि चिन्तामणि फुर्सेधारा पुगेका थिए। उनलाई फुर्सेधारा बोलाउने योजना लोकबहादुरको थियो। चिन्तामणिलाई फोन गर्दा लोकबहादुर जेदुसँगै थिए। फुर्सेधारा चिन्तामणिको घरबाट करिब डेढ किलोमिटर दक्षिण पर्छ। एक वर्षदेखि बिग्रिएको सम्बन्ध सुधार गर्ने अभिलाषा लिएर उनी जेदूलाई भेट्न गएका थिए। फुर्सेधारा पुगेपछि उनले जेदूसँगै लोकबहादुरलाई पनि देखे। लोकबहादुरले वर्षदिन अगाडिको घटना निकालेर निहुँ खोजे। चिन्तामणिले सुरूवातमा जबाफ दिएनन्, टार्न खोजे। तर लगातार आफूमाथि आरोप लगाउन थालेपछि रिसले चुरिएका चिन्तामणि लोकबहादुरतिर झम्टन्छन्। त्यति नै बेला लोकबहादुरले भरूवा बन्दुकको कुन्दाले चिन्तमणिको मुखमा प्रहार गरे। कुन्दा प्रहारबाट चिन्तमणि ढले। डिएसपी बस्यालका अनुसार कुन्दा प्रहारबाट चिन्तामणिको दाँत गिँजासहित झरेको थियो। ढलेर छटपटाउन थालेपछि लोकबहादुरले ढुंगाले टाउको र अनुहारमा प्रहार गरे। जेदूले पनि चिन्तामणिको टाउको र अनुहारमा ढुंगा प्रहार गरिन्। चिन्तामणि मरेको निश्चित भएपछि उनको गोजीमा रहेको सात हजार रूपैयाँ जेदूले लिइन् । मोबाइल लोकबहादुरले लिए र जंगलतिर भागे। चिन्तामणिको हत्यापछि जेदु केही थाहा नभएजसरी घरमै बसेकी थिइन्। लोकबहादुर दिनभर जंगलमा बस्ने र राति मात्रै घर आउने गर्थे। घटना अनुसन्धानमा डिएसपी बस्याल र प्रहरी निरीक्षक केशव केसी आँफै खटिएका थिए। घटनास्थल धुलाम्मे थियो । त्यहाँ दुई थरी फूटपिन्टहरु भेटिन्छन् । एउटा चप्पलको डोबहरु चिन्तामणिको थियो । जस्ले किचेनमा लगाउने न्यानो खाले चप्पल लगाइ गएका थिए । अर्को चप्पलका डोबहरु अनुसन्धान गर्दै जाँदा जेदुको रहेको खुलेपछि प्रहरीले उनलाई शनिबार नियन्त्रणा लिएको थियो। प्रहरीले सोधपुछ गर्दा उनी ५र६ घन्टासम्म नबोली बसेकी थिइन्। जेदूसँग लोकबहादुरको सम्बन्ध रहेको विषय प्रहरीले गाउँलेबाट थाहा पाएको थियो। त्यसअनुसार जेदुलाई नसोधी प्रहरीले उनको खोजी गरेको थियो। लोकबहादुर दिनभर जंगल बस्ने र राति मात्रै घरमा आउने सूचना पनि प्रहरीले पाएको थियो। यही बीचमा शनिबार राति लोकबहादुरले आफ्नो मोबाइल स्वीच अन गर्छन्। त्यसबाट प्रहरीलाई उनको लोकेसन ट्र्याक गरी शनिबार राति पक्राउ गरेको हो। लोकबहादुरलाई आइतबार बिहान ३ बजे प्रहरीले जिल्ला प्रहरी कार्यालय ल्याएको प्रहरी प्रवक्ता केशव केसीले जानकारी दिए। डिएसपी दिपेश बस्यालका अनुसार लोकबहादुरले चिन्तामणिको हत्यापछि साथमै लागेको उनको मोबाइल जंगलमा फोडेर फालेका थिए। फोडेर ओडारमा लुकाएको अवस्थामा चिन्तामणिको मोबाइल पनि फेला परेको छ । लोकबहादुरले भरुवा बन्दुक कहाँ लुकाएर राखेका छन् भन्नेबारे सोधपुछ भइरहेको पनि डिएसपी बस्यालले बताए।लोकबहादुर र जेदु दुवैले हत्या गरेको स्वीकार गरिसकेका छन्। उनीहरूविरूद्ध कर्तव्य ज्यान मुद्दामा थप अनुसन्धान अघि बढाइएको प्रहरीले जनाएको छ।

दुई ठूलादल एमाले कांग्रेस लागाएत अन्य साना दलहरु मिलेर बनेको ओली प्रधानमन्त्री नेतृत्वको गठवन्धन सरकार विरुद्ध सत्तामै रहेका मधेश केन्द्रित पाँच दलहरु नै सरकार विरुद्ध मोर्चावन्दीमा लागेका छन् । जसमा लोकतान्त्रिक समाजवादी पार्टी नेपाल, जनमत पार्टी, जनता समाज पार्टी, नागरिक उन्मुक्ति पार्टी, सरकारमै सहभागी छन् भने जनता समाजवादी पार्टी नेपालले सरकारलाई समर्थन मात्रै गरेको छ । मधेश केन्द्रित आठ दलहरु मध्ये तीन दल, राष्ट्रिय मुक्ति पार्टी नेपाल, जनता प्रगतिशिल पार्टी र तमलोपा सरकार बाहिर छन् । साना दलका कारण राजनीतिक अस्थिरता बढेको र राज्य व्यवस्था प्रणाली नै खलबलिएको भन्दै दुई दलीय व्यवस्थाका लागि थ्रेस होल्ड बढाउने र निर्वाचन प्रणाली नै पुनरावलोकन गर्ने नेताहरूले बताएका छन् त्यसका लागि ओली सरकारले संविधान संसोधनका लागि कार्यदल गठन गरेपछि आफुहरुले पनि कार्यदल बनाएको भनाई उनिहरुको रहेको छ । यदि संविधान संसोधन मधेशी, आदिवासी, जनजाति तथा पहिचानवादी विरुद्धमा आयो भने त्यसका लागि संघर्ष गर्ने तयारीका लागि मोर्चा बनेको मधेशी दलहरुको भनाई रहेको छ ।

बागमती प्रदेशका मुख्यमन्त्री बहादुर सिंह लामाले राजनीतिक अस्थिरताको अन्त्य र समुन्नत प्रदेश निर्माणका लागि दुई ठुला दल मिलेर सरकार गठन गरेको बताएका छन् । उनले नागरिकको आवश्यकता र माग पुरा गर्न सरकारले काम गरिरहेको बताए ।शुक्रबार बसेको प्रदेशसभाको बैठकलाई सम्बोधन गर्दै मुख्यमन्त्री लामाले सरकारले लोकप्रियता नभई आवश्यकताको आधारमा काम गरिरहेको बताए । प्रदेश सरकारको काम सरल र सहज बनाउन जिआइ ओएमएस सिस्टम जडान भएको उनले बताए । प्रदेश समन्वय परिषद्को बैठक सञ्चालन गरी निर्णय कार्यान्वयनको लागि अघि बढाइएको उनको भनाई छ । विपद्बाट प्रभावित नागरिकको लागि राहत वितरण गरिएको छ भने विपद् प्रभावित क्षेत्रको पुनः निर्माणको काम तीव्रता दिइएको छ ।’ उनले भने, ‘प्रदेश राजधानी र सङ्घीय राजधानी सहित प्रदेश अन्तर्गतको सडक पूर्वाधार पुनः निर्माणमा काम भइरहेको छ । प्रदेश सरकारको आयोजना छनौट व्यवस्थित गर्न आयोजना बैंक निर्माण गरी आगामी आर्थिक वर्षबाट कार्यान्वयन गर्नेगरी अघि बढाइएको छ ।’ प्रदेश सरकारी कामकाजी भाषा ऐन कार्यान्वयनको चरणमा रहेको उनले बताए । सरकारले प्रदेशमा कर्मचारी व्यवस्थापनको कामलाई तीव्रता दिई प्रदेश कितावखानालाई सक्रियतापूर्वक कर्मचारीहरूको तथ्याङ्क अद्यावधिक गर्ने काम गरिरहेको मुख्यमन्त्री लामाको भनाई छ ।

राष्ट्रिय स्वतन्त्र पार्टी सभापति रवि लामिछाने निलम्बन फुकुवाको माग गर्दै सभामुख देवराज घिमिरेलाई निवेदन दिएका छन् । अदालतले पुर्पक्षमा थुनामा पठाउने निर्णय गरेको खण्डमा मात्रै सांसद पदबाट निलम्बन हुनुपर्नेमा त्यस्तो नभएको निवेदनमा उल्लेख गरेका छन । रास्वपाकी सांसद सोबिता गौतमका अनुसार सांसद पदबाट निलम्बन फुकुवाको माग निवेदनमा गरिएको छ ।केहिबेरअघि लामिछाने सभामुख घिमिरेलाई भेट्न सिंहदरबारस्थित उनको कार्यकक्षमा पुगेका थिए । लामिछानेलाई संसद् सचिवालयले गत पुस ८ गते सांसद् पदबाट निलम्बन गरेको थियो ।

मधेशकेन्द्रित आठ दलको कार्यदलको पहिलो बैठक आज बस्दैछ । हिजो बिहीबार सिंहदरबारमा बसेको मधेशकेन्द्रित दलको बैठकले कार्यदल बनाएको थियो । शुक्रबार दिउँसो ३ बजे सिंहदरबारस्थित लोकतान्त्रिक समाजवादी पार्टीको संसदीय दलको कार्यालयमा बैठक बस्ने कार्यक्रम तय भएको छ । कार्यदलमा जसपाबाट इस्तियाक राई, जनमतबाट शरद सिंह यादव, जसपा नेपालबाट मनिष सुमन, नागरिक उन्मुक्तिबाट गंगाराम चौधरी, लोसपाबाट लक्ष्मणलाल कर्ण, राष्ट्रिय मुक्ति पार्टी केशव झा मेहता, जनता प्रगतिशीलबाट शिवजि यादव र लोसपाबाट ब्रजेश सिंह छन् । कार्यदलले साझा एजेण्डा तय गर्न मस्यौदा बनाउने, कार्यदलमा भएका विषय दलमा राख्ने, विधेयकमा समान धारणा लगातयका कार्य गर्ने निर्णय भएको थियो । कार्यदलले गरेका निर्णयमाथि सबै दलका अध्यक्षहरू बसेर थप निर्णय लिने बताइएको छ ।

अभियन्ता आशिका तामाङलाई बयानका लागि जिल्ला अदालत काठमाडौंमा उपस्थित गराईएको छ । जिल्ला प्रहरी परिसर भक्तपुरका डीएसपी ढुण्डिराज न्योपानेले तामाङ्लाई बयानका लागि अदालत पेश गरिएको बताए । ‘बयानका लागि अदालत पेश गरेका छौं । बाँकी काम अब अदालतबाट हुनेछ’, न्यौपानेले बताए । उनीविरुद्ध प्रहरी वृत्त जगातीले अपराधिक उपद्रवको कसुरमा अनुसन्धान गरेको थियो । मुलकी फौजदारी अपराध संहिताको परिच्छेद २६ मा आपराधिक उपद्रवसम्बन्धी उल्लेख छ । ऐनको दफा २८५ मा कसैले आपराधिक उपद्रव गर्न वा गराउन नहुने उल्लेख गरिएको छ । उक्त कसुर गर्नेलाई ५ वर्षदेखि १२ वर्षसम्म कैदको व्यवस्था छ । तामाङले ४ असोज २०८१ मा सूर्यविनायक नगरपालिका–९ बाट वडा नं १० मा जाने क्षेत्रमा रहेको झोलुङ्गे पुल चढ्दा लाग्ने शुल्कबारे विरोध गर्दै सामाजिक सञ्जालमा भिडियो हालेकी थिइन् । त्यसको तीन दिनपछि उनले साँगाको झोलुङ्गे पुल तरेवापत लिइने शूल्कको रसिदसमेत जलाइदिएकी थिइन । सोही विषयमा आशिकाविरुद्ध सूर्यविनायक नगरपालिकाले प्रहरी वृत्त जगातीमा आपराधिक उपद्रवको जाहेरी दिएको थियो । प्रहरी वृत्त गौशालाबाट अभद्र व्यवहारको कसुरमा मुद्दा चलेकी उनलाई जिल्ला प्रशासन कार्यालय काठमाडौंले सोमबार १० हजार धरौटीमा रिहा गर्न आदेश दिएको थियो । त्यसपछि उनलाई लगत्तै भक्तपुर प्रहरीले पक्राउ गरेको थियो ।